心夜來潮-

其實我去既係荃灣分店,但未顯示到喺呢個app度 ,但我照打住食評先啦

荃灣三陂防又稱為潮州街,因為成條巷都開滿大大小小既潮州菜館。夜晚去到就會見到每間菜館既侍應行出鋪外sell自己間餐廳,招呼客人入去,都幾有特色 而我今晚就黎左街尾既心夜來潮,估唔到真係咁正!!

第一眼見到本menu個封面已經覺得好靚。Menu都算多野食揀,亦都分好哂唔同section,就算唔係食開潮州野都好容易揀要啲咩。店員主動走過黎叫我地一定要試佢地招牌菜- 潮汕砂鍋粥。我地揀左膏蟹($120)同蠔仔($60)配粥。

我想講,唔食由自可,一食真係不得了,因為真-係-好-好-好-正!先講個粥本身,煲得好綿好滑,食落好似以前跟婆婆番潮州鄉下食過既味道,童年回憶都番哂黎 另外,啲膏蟹真係好多膏啊 啲蟹膏分散喺成鍋粥度,差唔多啖啖都食到:mad:加上啲蟹好足料,相信海鮮愛好者見到都會好興奮!啲蠔仔都落足料,唔會成鍋得果幾粒咁

另外,黎之前已經睇過啲食評介紹牙籤雞($58),所以亦都試左呢味咁趣緻既餸 啲無骨雞塊炸得好香脆,咬落仲有「卜卜」聲,好味!

仲有一樣必食既就係「亂棍打死豬八戒」($88)。本身的確係因為個咁得意既名先嗌,估唔到係咁好食!豬肉每塊肉質都夠爽,連四季豆下齊炒得超夠鑊氣,好有大排檔高質小炒既感覺❤️

最後,黎食潮州小炒又點可以唔飲啤酒呢?嗱嗱臨攞起隻戰鬥碗飲勝先

後記:今餐真心食得好滿足,最衰得兩個人唔食得幾好,下次一定要叫多啲人黎試埋我最愛既蠔餅同烏頭先得!

心夜來潮
地址:旺角塘尾道18號嘉禮大廈地下A鋪
作者:Ysabel Wong
原文:https://foodbulous.com/review/903

Leave a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.